Wednesday, November 20, 2013

29點與30年


有人說,叫人台慶熄機是「煽動」,「做乜無端端鬧TVB」。

很多人都善忘:一,TVB以《東張西望》指控對手,公器私用,大氣電波唔係畀你咁用的;二,也不要忘記,免費電視牌照一役,ATVTVB司法覆核,有份參與拖延,王維基燒錢兼失落牌照,TVB是最大得益者,大家唔好扮天真;三,TVB的藝員合約「濫用支配優勢」,有反競爭行為,又與ATV暗裡合作,自行分配頻譜,都是通訊局證實的違規行為。大台氣焰高漲,市民反彈有理。

又有人說,竟然還有29點收視咁多,好失望。

「熄機賀台慶」,收視出爐,無綫台慶收視平均29點,最高31點。翻查wisesearch數據最早能查到1998年。今年的29點,是最少16年來的新低。(29點,代表全港四歲以上人口29%收看,每點代表約65,000人。)

29點,多定少?

1.      比去年34點,大跌5點,不是小數目。
2.      阿叻謂,有高層預計有34點,如果屬實,則有30多萬觀眾的距離。
3.      TVB30點為捐錢界線,似乎是管理層可以接受的收視底線;以此比較,則29點可說是勉強不及格。
4.     於不滿TVB的朋友而言,還有29點收視,似乎難以置信。不過……

很多年前,我找中醫,醫鼻敏感,問中醫:要多長時間才醫好?

醫師問:「你鼻敏感多久了?」

「三十年。」

「三十年的病,如果三年能醫好,你要偷笑。」

世上沒有神醫,慣性也難以一朝一夕改變。

如果TVB台慶收視率,往後十年以每年1點的速度減少,大家應該可以偷笑。對龍頭大哥TVB而言,這已經是災難,但對普羅市民來說,是大好消息,代表著其他電視台提供更多節目選擇,節目、聲音更多元,民智有提升,香港更健康。

這場角力,只是一個開始。


***   ***   ***

相關文章:熄電視,有用嗎?
二十年來,唯一看過的TVB神劇《天與地》:如果 命運能選擇…

挪用了主場新聞一幅圖

附往年無綫台慶收視,資料來源:wisesearch

年分/平均/最高收視
2013  29/31
2012  34/36
2011  31/34
2010  35/37
2009  37/38
2008  34/35
2007  37/41
2006  35/40
2005  35/36
2004  35/39
2003  35/37
2002  37/39
2001  36/38
2000  35/38
1999  32/ --
1998  36/ --
 

11 comments:

  1. 如果論跨平台收視率,台慶收視率育肯定及格有餘。熄機行動失敗就是失敗,公我嬴字你輸只會把自己淪為另一個CY或TVB。

    ReplyDelete
  2. 註:跨平台收視率或有打X機成份,但不要忘記除了上MYTV重溫之外,也有很多人看MYTV那條直播頻道,與電視同步,甚至邊看邊玩FB/DISCUSS。正如我想看互動新聞台,都是看手機版或TVB新聞網的轉播,而不是開電視機。SKIP廣告問題,難道傳統電視播廣告,觀眾不會轉台/去廁所。所以我估熄機只能郁到一兩點觀眾,雖然近十萬觀眾也算可觀。

    ReplyDelete
  3. 去年的數據應該沒有計算跨平台收視率,故我相信這樣的對比應是公允的。

    ReplyDelete
    Replies
    1. 但今年轉左調查公司,收視普遍低了。甚至之前有線投訴過尼爾森搞到佢地零收視。不過亦有可能是CSM之前有問題。而且我想指出的是MYTV對傳統收視率的影響的確是去年開始先逐漸浮現族流動版都係11年台慶之後先推出),只是一時間我等草民未必有確實數據證明。

      Delete
    2. 所以,我同意,網上收視需要計算,故我從無批評過TVB「搬龍門」。

      不過,現實上,廣告商唔多理網上平台的收視率,觀眾轉移到網絡,廣告不會跟住去,電視台流失的收益亦未能在網絡找回來。現實裡,越多人網上看,收視或許數據能維持,但廣告收益不能維持,對電視台來說是很大的兩難。

      Delete
    3. 所以估計以後越來越多全包宴,一個價錢落哂電視網站甚至周刊廣告。雞汁式行銷都係門路。

      Delete
  4. 而TVB真正問題是,觀眾看電視的習慣會改變,品味更多元化,好難用一個翡翠台、一套師奶劇去通殺觀眾。但要製作不同類型節目,成本必會大增,但J2/網上收視/收入能否支撐多元化製作? TVB人才的能力能否跟上觀眾口味轉變? 仲有,搞傳媒係政治化左,歸邊就俾網民罵、扮民主鬥士又被愛港力/政府針對,在黑白二分下強調中立持平亦都冇人會信,連BLOOMBERG都搞唔掂既事,TVB班老人會搞得掂咩?

    ReplyDelete
  5. 根本問題就在於香港地七百萬人之中,實在係有比例唔少既人,覺得民主同普選係冇必要的。呢班人,為數不少。我地也許覺得佢地愚昧,覺得佢地中晒當權者既圈套,但呢班人,的確係存在。要呢大班人改變,難度太高了。假如民主係要尊重所有人既意願,咁呢班人,點搞呢?

    ReplyDelete
    Replies
    1. 我認為,這群人為數不少,但屬於沉默一群,在今後的社會變遷中,將不起大作用,民主普選什麼,有又好無又好,他們都不關心的。

      Delete
  6. 近日討厭紛紛攘攘,唔想噏嘢。不過呢齣連續劇,真係茶餘飯後,順嫂都噏兩聲。
    最近劇情有東週 (及其聯營公司) 大戰維基 (及其聯營公司) ,而最新發展係無線 (及其聯營公司) 封殺壹週 (及其聯營公司) 。
    壹週唔係我杯茶,不過講明封殺真係 __ (填充題: 天真/認真/無聊/無知/愚蠢/英明/ 其他自選 - 諗唔到咁多)。大佬呀,出嚟搵食,求財啫,唔係求氣呀?
    "無線及旗下藝員的活動將不接受壹傳媒記者採訪" -- 我幻想緊,壹週記者又大做無線醜聞,偷拍無線及旗下藝員,會同藝員講明: 嗱,我偷拍緊你,無謂你難做,你求其俾我影影 deep V,你又 acceptable,我又 satisfied。

    ReplyDelete
  7. 一.Tvb係一間牟利既上市公司, 佢唔希望引入競爭係一件天公地道既事, 冇乜野傷天害理. 佢用既都係合法正當既手段, 如司法覆核等, 法庭判佢輸咁件事就完左啦, 唔通大部分人認同既事先可以申請司法覆核, 唔認同就唔得?
    二. 每間傳媒都會係自己的平台上宣傳自己的主張, 咁佢係<>用半個鐘講自己觀點又有幾公器私用呢? 定係講得啱聽就係持平, 講得唔啱聽就係偏頗呢? 有句說話叫:我唔認同你既觀點, 但我誓死捍衛你表達意見既自由. 大家會唔會對佢太mean呀?
    可能大家期望tvb可以大方到不為自己利益著想去撐港視, 但tvb又做唔到, 咁自私都唔係乜野死罪呀.
    三.[私下向亞視租未用到的頻譜] 大氣電波俾左亞視, 佢唔用係一種浪費, 而家tvb俾錢廢物利用, 觀眾得益又冇損失, 有乜問題先? 好啦, 你話咁樣違規, 咁都係因為條例唔合理, 兩個台都即時申請將件事正規法啦.
    四. [TVB的藝員合約「濫用支配優勢」,有反競爭行為] 呢個的確係tvb太霸道, 但係呢件事唔係今日先知, 咁多年點解大家唔反對? 要係今日將所有野撈埋一齊講?

    我個人覺得香港政府道義上應該發牌俾港視, 引入競爭亦係好事, 而家香港政府唔發牌, 冤有頭債有主, 應該搵番梁振英, 做乜轉移左視線去針對現有既經營者? 如果大家係想多d選擇, 就更唔應該杯葛tvb, tvb死左唔係更少選擇咩?

    ReplyDelete